O BOE publicaba o pasado sábado o ditame da dirección da Dirección Xeral de Política Enerxética e Minas pola que lle outorga autorización para a modificación dos proxectos e as súas infraestruturas de evacuación
Desde o executivo lamentan esta decisión e presentarán o recurso de alzada preciso para tentar revocar esa decisión
O Concello de Cerdido anuncia que recorrerá as resolucións da aprobación administrativa das modificacións dos proxectos dos parques eólicos do Badulaque e Barqueiro publicadas esta semana.
O pasado sábado, 10 de agosto, o Boletín Oficial do Estado anunciaba estas resolucións, polas que a Dirección Xeral de Política Enerxética e Minas lle outorgaba á empresa Enel Green Power as autorizacións para as modificacións dos proxectos dos parques eólicos e as súas infraestruturas de evacuación, que afectan directamente ao termo municipal cerdidense.
Por un lado, o parque do Badulaque contaría con 16 aeroxeneradores de 6,4 MW e nove liñas subterráneas, que conectarían o parque coa subestación, que tamén estaría localizada no termo municipal de Cerdido.
Pola súa banda, o parque do Barqueiro contaría con 18 aeroxeneradores e outras nove liñas subterráneas que os unirían coa subestación, que neste caso estaría situada no Concello de Ortigueira.
O prazo para presentar o recurso de alzada contra esta resolución remata o vindeiro 10 de setembro, pero segundo indican desde o Concello de Cerdido “realizaremos os trámites para presentar as alegacións o antes posible, conscientes da importancia que ten o avance deste proxecto para a nosa veciñanza”.
En palabras do alcalde de Cerdido, Alberto Rey, “poremos todo da nosa parte para tratar de frear a execución destes parques eólicos, posto que consideramos que poden ter unhas consecuencias irreparables para o noso Concello, tanto para os veciños e veciñas como para o propio medio natural”.
